Verë lamtumirash, Reali e Barça 30 lojtarë në ankand

Mirupafshim ose lamtumirë!

Në Madrid dhe në Barcelonë do të jenë dy përshëndetje që do të dëgjohen shumë shpesh në merkaton e verës. Në dy kampet më të mëdha të futbollit spanjoll do të ketë ndarje të mëdha dhe të dhimbshme, sepse do të largohen shumë futbollistë për të ndërtuar organikën ideale për arritjen e objektivave. Për momentin ka shumë futbollistë në të dyja skuadrat, të cilët do të huazohen ose do të shiten. Në Madrid situata është më e vështirë sesa në Barcelonë, por në total mund të jenë afro 30 lojtarë nga të dyja skuadrat që do të marrin valixhet. Pushimet nuk do të jenë të qeta në zyrat e “Bernabeu”-t dhe “Camp Nou”-t, sepse bëhet fjalë edhe për emra të rëndësishëm dhe kampionë që kanë bërë histori në të dyja skuadrat. Gazeta “MARCA” analizon situatën e të dyja skuadrave dhe rastet më delikate si Rakitiç dhe Umtiti te Barcelona, apo James, Bale dhe Mariano te Reali i Madridit. Kjo është një merkato e çuditshme edhe për shkak të krizës nga Koronavirusi. 

REALI
Reali ka një organikë shumë të fryrë dhe nëse do të llogaritim Reinierin, do të jenë 26 lojtarë në verë pa harruar të rinjtë Javi Sanches, Soro dhe De Frutos. Në portë do të rikthehet Lunin për t’i zënë vendin Areolas. Rasti i Achraf Hakimit është ai që po diskutohet më shumë në zyra. Askush nuk dyshon te potenciali i tij, por ka dyshime nëse mund të vazhdojë të jetë pjesë e Realit. Prezenca e Carvajall në të djathtë dhe e dyshes Marcelo-Mendy majtas ia vështirësojnë objektivin për të qenë titullar. Për më tepër, Hakimi ka shumë oferta të mira. Në mesfushë Ceballos nuk është në planet e Zidanit, Reguilòn mund të qëndrojë edhe një sezon te Sevilla. Odriozola është në ajër, por fakti që u largua në janar të bën të mendosh se nuk do të qëndrojë në Madrid. Oscar ka shkëlqyer këtë vit te Leganes, por te Reali formacionin duhet ta shikojë me dylbi. Reinier do t’i bashkohet ekipit të parë pak nga pak. Kalojmë te peshat e rënda: James dhe Bele. Situata e tyre nuk ka ndryshuar dhe sërish janë në merkato. James ka vetëm një vit kontratë dhe largimi i tij është më i lehtë, ndërsa Bale si gjithmonë është problem. Kontrata e tij është e vlefshme deri në vitin 2022, por Zidane nuk e ka në plane. Lojtarët e tjerë që do të largohen janë Brahim Diaz dhe Mariano, po ashtu edhe Joviç mund të huazohet. Pastaj ekziston një grup futbollistësh, që vazhdimësia e tyre nuk garantohet si Marcelo dhe Lucas Vasquez.

BARCELONA 
Organika e Barcelonës është më pak e fryrë sesa ajo e Realit (19 lojtarë në ekipin e parë), por me të tjerë si Peña Araujo, Riqui Puig apo Ansu Fati nga akademia. Problemi është se lojtarët që janë në skuadër do të ndryshojnë për të patur një revolucion. Barcelona po përgatitet për të larguar më shumë lojtarë se Reali. Vetëm disa prej tyre e kanë vendin të sigurt te katalanasit: Ter Stegen, Pique, Alba, Busquets, De Jong, Messi, Suarez, Griezmann). Të tjerët si Neto, Roberto, Umtiti, Junior, Rakitiç, Vidal dhe Breithueit janë në merkato. Shkëmbimet janë në modë në Barcelonë dhe kjo është formula që mendohet si e duhura për të arritur te lojtarët si Lautaro Martinez dhe Pjaniç. Juventusi pretendon Artur, por braziliani nuk ka ndërmend të largohet. Semedo gjithashtu është në listën e largimeve dhe ai ka nisur bisedimet me disa skuadra. Coutinho, Vague, Todibo, Oriol, Pedri, Emerson janë lojtarë që do të rikthehen të luajnë në “Camp Nou” dhe nuk ka vend për të gjithë. Për Dembele po bëhet një analizë më e thellë, sepse francezi po rikthehet nga dëmtimi dhe Quique Settien mund t’i japë një shans tjetër.

/Panora Sport