Si luftë!

Javët e fundit stadiumet e futbollit kanë nisur të shndërrohen në arena përleshjeje. Incidenti në Merdarë është pasuar nga ai që ndodhi të mërkurën në Koretin, ku pati gjithçka, pos futbollit. Drejtuesit e Kikës thonë se e panë tmerrin në Kamenicë, ku nuk munguan as sulmet fizike nga larg dhe nga afër. Nga ana tjetër, drejtuesit e Bashkimit vendës ankohen për dëme materiale, të shkaktuara nga mysafirët e Hogoshtit. Si rezultat, katër lojtarë të Kikës përfunduan në spital, kurse Policia e arrestoi veç një person shkruan sot Gazeta Zëri

Duket se pranimi i futbollit kosovar në UEFA e FIFA nuk ka ndikuar aspak tek tifozët huliganë.

Pak javë pas incidentit që ndodhi në Merdarë, ku u sulmua fizikisht gjyqtari në ndeshjen e Superligës ndërmjet Llapit dhe Feronikelit, skenat e dhunës janë përsëritur të mërkurën, respektivisht në ndeshjen e rrethit të dytë të Kupës së Kosovës ndërmjet Bashkimit dhe Kikës.

Tifozët e Koretinit në Kamenicë, me të përfunduar ndeshja i kanë sulmuar fizikisht futbollistët nga Hogoshti, duke i lënduar seriozisht disa prej tyre.

Si rrjedhojë, Kryesia e Kikës ka dalë me një komunikatë, përmes së cilës ankohet për tmerrin që e panë lojtarët të mërkurën, me ç’rast ka publikuar edhe fotografi, të cilat i vërtetojnë lëndimet e lojtarëve të kësaj skuadre.

“Ajo që e përjetuam ne si kryesi e klubit dhe shtab teknik dëshirojmë që ky tmerr të jetë i fundit për futbollin e Kosovës. Me të arritur në stadium në orën 13:00, vendësit filluan kërcënimet nga më banalet, si nga personat zyrtarë ashtu edhe nga tifozët e klubit vendës.

Këta të fundit, ende pa filluar loja hidhnin gjësende të forta në fushë: gurë dhe shishe të mbushura me ujë në drejtim të lojtarëve dhe shikuesve tanë. Kjo ka vazhduar edhe gjatë lojës dhe si pasojë ka pasur tifozë tanë të lënduar”, njofton klubi nga Hogoshti.

Kryesia e këtij klubi i ka mbledhur lojtarët dhe i ka këshilluar të mos e kërkojnë fitoren me çdo kusht, pasi, sipas tyre, primar në Koretin ishte shëndeti i lojtarëve, në një fushë e cila më shumë i ngjante një beteje lufte sesa një lojë futbolli.

Gjithashtu, drejtuesit e Kikës thonë se lojtari i tyre Artan Xhaqkaj ka përfunduar në Qendrën Emergjente në Gjilan, pasi paraprakisht është grushtuar qysh në minutën e shtatë nga lojtari vendës, Taulant Kurteshi.

Sipas tyre, hogoshtasit janë provokuar vazhdimisht, por edhe janë sulmuar nga ndihmëstrajneri i vendësve, Labinot Haxhiu, si dhe janë futur me dhunë në zhveshtore pas përfundimit të pjesës së parë.

Tmerri ka vazhduar edhe në pjesën e dytë, ndërsa mysafirët ankohen se loja e vendësve ishte brutale, duke i lënduar lojtarët mysafirë, me ç’rast Bekim Skoverqani i mikpritësve është ndëshkuar me karton të kuq.

“Ne mezi prisnim fishkëllimën e fundit të gjyqtarit për ta mbyllur lojën, duke menduar që e gjithë kjo të përfundojë me kaq, mirëpo ai mllef, fyerje dhe kërcënim nga i gjithë stafi, sigurimi dhe tifozët e Bashkimit arritën kulminacionin. Lojtarët tanë papritmas sulmohen nga një pjesë e kryesisë dhe nga lojtarët e ekipit vendës. Si rezultat, në fushë hynë edhe tifozët e pjesës perëndimore dhe si pasojë lëndime trupore pësuan disa lojtarë tanë. Katër prej tyre u detyruan të kërkojnë ndihmë mjekësore. Këto skena të tmerrshme kanë ndodhur vetëm në ndeshjen Serbi – Shqipëri”, rrëfen tmerrin Kryesia e Kikës.

Bashkimi: Kika na bëri dëme

Ndërkohë, edhe Kryesia e Bashkimit është ankuar për dëmet materiale që, sipas tyre, ua kanë bërë mysafirët nga Hogoshti.

“Lojtarët e Kikës e kanë demoluar WC-në e zhveshtores dhe tifozët e Kikës kanë poseduar mjete të forta dhe kanë dëmtuar shportat e mbeturinave”, njofton klubi nga Kamenica.

Policia: Katër lojtarë të lënduar, ka të arrestuar

Policia e Kosovës ka njoftuar se është arrestuar një person, i cili pas ndeshjes së bashku edhe me një të dyshuar tjetër kanë hyrë në fushë dhe kanë sulmuar fizikisht katër lojtarë të Kikës, duke u shkaktuar lëndime trupore.

Këta të fundit kanë përfunduar në spital dhe po trajtohen nga stafi mjekësor.

FFK-ja dënon incidentin, paralajmëron dënime

Federata e Futbollit të Kosovës e ka dënuar incidentin e ndodhur në Koretin, duke paralajmëruar masa ndëshkuese për keqbërësit. “Çdo incident e dënojmë, sidomos pas pranimit në UEFA e FIFA.

Këto gjëra nuk i sjellin asnjë të mirë futbollit kosovar. Ata që shkaktojnë incidente do ta pësojnë. Vendimet do t’i marrin komisionet përkatëse”, thonë në FFK.