Lufta për Superligë

Drenasi përcakton dy skuadrat që do të jenë pjesë e Superligës

Vëllaznimi të dielën do të luajë ndeshjen finale të Kupës me Prishtinën, mirëpo për gjakovarët shumë më e rëndësishme është ndeshja e së enjtes, kur ballafaqohen me Ferizajn, përballje kjo që do të përcaktojë se cila skuadër do të luajë në Superligë. Një biletë për Superligë e kërkojnë edhe Vushtrria e Flamurtari, që luajnë sot ndërmjet vete

Në Vushtrri tash e disa javë i madh e i vogël është duke folur për sfidën e sotme ndaj Flamurtarit. I gjithë qyteti është mobilizuar për t’i përkrahur futbollistët që në ndeshjen kryesore të vitit të arrijnë fitore dhe në këtë mënyrë pas disa vitesh mungesë të rikthehen në rangun më të lartë të garave

Flamurtari, Vushtrria, Ferizaj e Vëllaznimi kanë vetëm edhe një shans për të qenë ose jo pjesë e shoqërisë elite të futbollit. Këto skuadra sot e nesër do t’i zhvillojnë ndeshjet e barazhit, nga të cilat do të dihen dy skuadrat që në edicionin e ri do të jenë pjesë e Superligës. Kjo edhe është arsyeja që për këto ekipet këto ndeshje të cilësohen si ndeshjet e vitit. Në fakt Vëllaznimi të dielën do të luajë ndeshjen finale të Kupës mePrishtinën, mirëpo për gjakovarët shumë më e rëndësishme është ndeshja e së enjtes ku ballafaqohen me Ferizaj, përballje kjo që do të përcaktojë se cila skuadër edicionin e ardhshëm do të luajë në Superligë. Kjo edhe po bën që e gjithë vëmendja e futbolldashësve këtë mesjavë të jetë e përqendruar në Drenas aty ku zhvillohen për dy ditë rresht ndeshjet e barazhit të Superligës.

Sot në program është sfida ndërmjet Vushtrrisë e Flamurtarit ndërsa të enjten në të njëjtën fushë luajnë Vëllaznimi dhe Ferizaj. Flamurtari e Vëllaznimi në këto ndeshje hyn si favoritë përballë Vushtrrisë përkatësisht Ferizajt, dhe kjo për të vetmen arsye, pasi janë skuadra të Superligës dhe gjatë gjithë vitit kanë pasur përballje shumë më të forta sesa që kanë pasur Vushtrria e Ferizaj në Ligën e Parë. Gjithsesi, analistët presin lojë shumë të forta dhe do të jetë shumë vështirë të përcaktohet skuadra që në edicionin e ardhshëm do të luajë në elitën e futbollit. Mst: Osmani: Ndeshje e vitit Në Vushtrri tash e disa javë është duke u folur vetëm për sfidën e sotme ndaj Flamurtarit. I gjithë qyteti është mobilizuar për t’i përkrahur futbollistët që në ndeshjen kryesore të vitit, të arrijnë fitore dhe në këtë mënyrë pas disa vitesh mungesë të rikthehen në rangun më të lartë të garave. “Përballja me Flamurtarin është ndeshja e vitit kështu që ne jemi përgatitur maksimalisht për këtë sfidë”, ka thënë për gazetën “Kosova Sot” sulmuesi vushtrrias, Labinot Osmani. Ai beson se skuadra e tij ka forcë për ta përballuar sfidën e fundit dhe në këtë mënyrë të rikthehet në shoqërinë elite. “Ne kemi forcë dhe përgatitje të mjaftueshme ta përballojmë këtë sfidë. Të gjithë po besojmë se do të rikthehemi në Superligë. Sa i përket kundërshtarit, e vlerësojmë dhe e respektojmë si gjithë kundërshtarët e tjerë. Nuk kemi aspak frikë, edhe pse e dimë që përballemi me një ekip që ka garuar në një rangë më lartë, por ne do të japim maksimumin për fitore”, ka thënë Osmani për gazetën “Kosova Sot”.

I bindur në sukses është edhe tabori i Flamurtarit, i cili pasi arriti më shumë vështirësi ta sigurojë barazhin, duke e larguar nga elita një ekip tejet me përvojë si Besën, ka arsye të besojë se mund ta mposhtë edhe Vushtrrinë. Mst: Nxehtë edhe në ndeshjen Vëllaznimi – Ferizaj Një sfidë shumë e fortë do të jetë edhe në përballjen Vëllaznimi – Ferizaj.

Atmosfera në stadiumin “Rexhep Rexhepi” në Drenas pritet të jetë shumë e nxehtë, pasi si tifozët e Vëllaznimit ashtu edhe ata të Ferizajt kanë paralajmëruar një mbështetje të madhe për ekipet e tyre. Vëllaznimi në ndeshjen e fundit të Superligës kishte mundësin t’i ikë barazhit, por nuk arriti të fitojë para tifozëve të vet përballë Gjilanit, kështu që tash elitën duhet ta kërkojë përmes barazhit. Në anën tjetër Ferizaj që në radhët e veta ka futbollistë tejet me përvojë dhe një trajner të njohur si Bylbyl Sokoli, ka arsye të forta të besojë se do të arrijë të fitojë dhe në këtë mënyrë të rikthehet në elitë pas vetëm një viti mungesë.