Mesfushori i Real Madridit, Toni Kroos beson se skuadra e tij do ta eliminojë Bayernin në çerekfinale të Ligës së Kampionëve.
Fati në short i rezervoi futbollistit të kombëtares gjermane, ish ekipin e tij, me të cilin fitoi disa trofe, por për Kroos nuk ka dyshime se kush do të triumfojë.
“Nuk jam aspak i frikësuar nga Bayern pasi nëse duam të fitojmë sërish Ligën e Kampioneve, Bayern apo Barcelona janë patjetër në rrugën dhe kundërshtar potencial. Gjithmonë më kanë pëlqyer ndeshjet e mëdha dhe përballja me më të mirët, e kjo ndaj bavarezëve nuk është ndryshe”, tha mesfushori gjerman.
Toni Kroos diskutoi gjithashtu ndryshimet me ekipin që ka luajtur më parë dhe Realin, ngjyrat e të cilit mbron tani, duke nisur nga banka rezervë.
“Zidane ka një ide shumë të qartë se çfarë kërkon nga futbollistët dhe e transmeton këtë shumë mirë. Atij nuk i duhet një fjalim motivues prej 20 minutash. Mjafton prezenca e Zidane dhe personaliteti që e karakterizon, së bashku me sukseset, për të arritur atë që do”, tha mesfushori Kros.
