E premtja 9 Qershor 2017 është ditë historike për basketbollin 3×3 (streetballin) sepse nga kjo ditë, ky sport u bë Sport Olimpik.

Bordi Ekzekutiv i Komitetit Olimpik Ndërkombëtar (KON) ka publikuar vendimin që të përfshij 64 sportist, 32 basketbollistë dhe 32 basketbolliste të basketbollit 3×3 (apo si e quajmë në Kosovë Streetballit), në kuadër të programit olimpik për LOV Tokio 2020.

Duke shtuar këtë disiplinë të re urbane në kuadër të programit të vet olimpik, KON-i i ka dhënënjë shtytje të paparë zhvillimit të Streetballit dhe ka ofruar një hapësirë të pafundme për promovim të lojtarëve nga gjitha viset dhe shtetet e botës, duke përfshirë edhe Kosovën.

“Kjo është ditë historike për FIBA-në dhe 3×3”, tha Sekretari i Përgjithshmë i FIBA-së dhe anëtari i KON-it, Patrick Baumann duke shtuar se “ Kjo është mirënjohje dhe vlerësim i lartë i punës së palodhshme 10 vjeçare në krijimin e kornizës së rregullave unike të lojës 3×3 dhe zbulimin e platformës unike digjitale të basketbollit 3×3 si dhe sistemin e renditjes së lojtarëve i cili bashkon të gjithë sportistët dhe organizatorët e ngjarjeve të basketbollit 3×3 apo streetballit, në një rrjet të përbashkët të organizimeve të FIBA 3×3”

3×3 përmban ADN-në olimpike në vete

Më 2007, FIBA kishte vendosur t’i propozoj KON-it që basketbollin 3×3 t’ia shtoi Lojërave Olimpike për të Rinj në Singapor, duke u bërë kështu ngjarja e parë zyrtare e 3×3 në ndonjë ngjarje të organizuar nga KON-i dhe duke pasuar pastaj edhe me përfshirjen e këtij sporti në vitin 2014 në Nanjing të Kinës. Me vendimin e sotëm, basketbolli 3×3 bëhet disiplina e parë sportive e promovuar në kuadër të Lojërave Olimpike për të Rinj e cila është përfshirë në programin Olimpik.

Nga ajo kohë, 3×3 është rritur dhe ka aaritur në nivelin ku basketbollistët profesionist kanë filluar ta luajnë këtë sport , kurse TV, mediat bashkohore dhe rrjetet sociale t’i kushtojnë rëndësi të jashtëzakonshme e cila e ka popullarizuar tejmase këtë sport.

foto logo streetball kosova dhe foto Erjoni dhe Agoni (dresat 3×3) shqiperi-kosove
Me organizimet e veta që nga viti 2000, menjëherë pasluftës, Streetball Kosova dhe udhëheqësi i saj Agon Fehmiu kanë ndikuar jashtëzakonisht shumë në promovimin e këtij sporti edhe në Kosovë.

Me vizionin të cilin e kishte Fehmiu për ta promovuar basketbollin në radhë të parë, më pastaj edhe basketbollin 3 kundër 3 në një kosh apo si e quajmë në vendin tonë Streetball, ai ka bërë që Kosova të mos mbetet prapa në aspektin e përcjelljes së trendeve botërore.

Për më tepër, nga viti 2005 kur Streetball Kosova edhe zyrtarisht u bë pjesë e Federatës së Basketbollit të Kosovës, kjo shoqatë e udhëhequr nga Agon Fehmiu ka punuar në ndërkombëtarizimin e streetballit kosovar duke qenë në kontakte të vazhdueshme me FIBA-në e cila në vitin 2010 e themeloi departamentin e saj FIBA 3×3, kurse Streetball Kosova arriti të bëhet pjesë e saj integruese me 12 shkurt 2013, si organi i parë zyrtar i basketbollit kosovar. Andaj, lajmi për pranimin e 3×3 në familjen olimpike ishte lajm tejet i gëzueshëm për Agon Fehmiun i cili tërë jetën e tij ja dedikoj basketbollit dhe në veçanti streetballit.

“Ëndra e kamotshme dhe ajo për çka kemi punuar nga viti 2000, promovimi i streetballit dhe lojës së basketbollit “3 kundër 3” në një kosh , në Kosovë, në regjion dhe mbarë botën, sot ka kulmuar me lajmin më të bukur të mundshëm: pranimin e këtij sporti në familjen olimpike. Unë e kisha ëndrën dhe kjo ëndër sot u bë realitet” deklaroi Agon Fehmiu, kryetari i Streetball Kosova – Shoqatës së Streetballit të Kosovës anëtare e FBK dhe organi i parë i kësaj federate i pranuar në FIBA, me 12 shkurt 2013.

Njeriu i cili ishte lokomotivë dhe më i merituari për promovimin e basketbollit në Kosovën e pasluftës, Agon Fehmiu, me punën e vet të palodhshme në transmetimin e ngjarjeve më të mëdha vendore dhe ndërkombëtare si dhe prodhimin e emisionit të parë në histori të televizioneve shqiptare dedikuar ekskluzivisht basketbollit, Asist, bëri që ky sport të shndërrohet në sportin më të popullarizuar në vend.

Paralelisht, nga viti 2000, ai iu rrek punës për ta promovuar në mënyrë të organizuar edhe lojën e basketbollit 3×3 në një kosh apo si e quajmë në vendin tonë – Streetballin. Në vitin 2005 u bë anëtar i FBK-së dhe nga 2013 i FIBA 3×3, vazhdimisht duke punuar në ngritjen e nivelit të organizimit të këtij sporti në Kosovë, si dhe promovimin e tij në arenën ndërkombëtare. Megjithatë, jo gjithçka shkoi lehtë për Streetball Kosova.

“Gjatë rrugëtimit tonë të mundimshëm dhe të gjatë gati dy dekada, kemi pasur shumë vështirësi organizative por edhe obstrukcione dhe pengesa subjektive që përherë jemi munduar t’i tejkalojmë në mënyrë elegante dhe inteligjente, vazhdimisht duke synuar rezultatin pozitiv dhe më të mirën e këtij sporti, organizimin sa më të mirë në Kosovë, përfaqësimin e denjë ndërkombëtar dhe njëherësh bashkëpunimin me FIBA 3×3 në betejën tonë të përbashkët globale, anëtarësimin e Basketbollit 3×3 në familjen Olimpike. Sot, kjo ëndër u arrit” theksoi me shumë gëzim Agon Fehmiu, duke shtuar se tash beteja e ardhshme është ngritja e nivelit të streetballit kosovar në nivelin reprezentativ.

“Shikoni, Shoqata e Streetballit të Kosovës vazhdimisht punon dhe nuk ndalet. Ka ngritur në nivelin më të lartë të mundshëm në kuadër të rrethanave vendore, basketbollin 3×3 kosovar dhe tash është koha që ta kemi edhe përkrahjen institucionale të organizuar. Aktualisht, mund të them se duke i falënderuar përkrahjes së Ministrisë së Kulturës Rinisë e Sportit të Kosovës, gjegjësisht Departamentit të Sportit të Kosovës, është duke u punuar në ngritjen e infrastrukturës sipas standardeve botërore të FIBA 3×3 dhe është duke u planifikuar organizimi i një gare ndërkombëtare që do të jetë testi i fundit para se të organizohet gara e nivelit Challenger (niveli i dytë më i lartë botëror ekipor i FIBA 3×3) në vitin 2018” tha Fehmiu, duke shtuar se sivjet përsëri kanë pasur pengesa dhe obstruksione nga kundërshtarë të Streetball Kosova, njerëz të caktuar që vijnë nga politika dhe biznesi kosovar dhe të cilët për interesa personale dhe përfitime individuale kanë ndikuar negativisht tek një numër i caktuar i përkrahësve të Streetball Kosova.
I pyetur se për kë bëhet fjalë, Agon Fehmiu nuk deshi t’i emëroi ata individ dhe grupe të interesit me arsyetimin se nuk ka kohë dhe as që dëshiron të merret me ata njerëz duke shpenzuar energjin në gjëra të kota dhe negative porse gjithë potencialin është duke e koncentruar në organizimin sa më të suksesshëm të kampionatin shtetëror të Republikës së Kosovës në 3×3, Streetball Kosova 2017 dhe turneun e dytë ndërkombëtar Streetball Kosova International 2017, të dyja këto ngjarje të pranuara dhe licencuara nga FIBA 3×3 Basketball.

Krejt në fund, Agoni theksoi se lajmi i sotëm që erdhi nga Komiteti Olimpik Ndërkombëtarë dhe FIBA, për pranimin e 3×3 në familjen olimpike, është edhe një dëshmi e mirë se njerëzit që kanë vizion përparimtar në Kosovë duhen të përkrahen.

“Po më vjen shumë mirë që sot u realizua ajo që unë e kam paralajëmruar tash e një dekadë se, streetballi apo basketi 3×3 shumë shpejtë do të bëhet tejet i popullarizuar në botë dhe do të bëhet sport olimpik. Ka pasur shumë zëra kundërshtues dhe reaksionar në Kosovë, pse mos të them edhe injorant të tillë që thoshin ‘aiii, hiçmu allahile me atë Agon budallën edhe këtë sport mëhalle’ madje duke e etiketuar si sport të rrugaçëve. Mirëpo këtë të premte, ky sport i bukur dhe atraktiv urban, e gjeti rrugën e vet ‘nga rruga deri në Olimpiad” tha Agon Fehmiu, kryetari i Shoqatës së Streetballit të Kosovës duke ftuar FBK-në dhe KOK-un që tash e tutje ti besojnë shumë më tepër dhe ti kushtojnë rëndësi sepse sipas tij, ky është sport me të cilin Kosova mund të arrij sukses.
“Shikoni, sikurse që kam thënë dhe punuar për ta promovuar dhe bërë basketbollin sport no.1 në Kosovën e pasluftës, ashtu po ju them se ky sport mund të bëhet sporti i parë ekipor që Kosovës mund t’i sjell sukses në arenën ndërkombëtare. Le të thonë pastaj injorantët se përsëri jam duke folur pallavra por një gjë po ju garantoj, sikurse që kam ditur ta promovoj basketbollin dhe streetballin, ashtu edhe do ta ngris 3×3 kosovar në arenën ndërkombëtare. Mirëpo, tash e tutje duhet përkrahja edhe institucioneve shtetërore. Eksperiencën dhe ekspertizën e kam, por ‘malin me gjoks nuk mund ta shtyjë’” përfundoi Fehmiu duke iu falenderuar në fund përkrahjes së parezervë të mbështetësve tradicional që ndihmuan këtë sukses, në radh të parë institucioneve vendore si Ministrisë së Kulturës Rinisë dhe Sportit të Kosovës e cila për një dekadë ka besuar në vizionin përparimtar të Streetballit Kosovar, me theks të veçantë në udhëheqësit e fundit të MKRS-së që kanë bërë një punë të madhe duke e mbështetur maksimalisht tentimin për ngritjen e infrastrukturës për 3×3, sipas standardeve më të larta të FIBA 3×3 për organizimin e top-ngjarjeve ndërkombëtare në vendin tonë.

Njëherësh, Fehmiu e falënderoi edhe Asociacionin e Komunave të Kosovës për përkrahje 12 vjeçare, duke veçuar përkrahjen e Komunës së Prishtinës kurse në fund theksoi edhe përkrahjen që Presidenti aktual i Kosovës po i jep këtij sporti për ta organizuar ngjarjen ndërkombëtare. Po ashtu, Streetball Kosova e falënderoi Ambasadën e Norvegjisë si të vetmin institucion ndërkombëtar që ka dhënë përkrahje të parezervë në zhvillimin e këtij sporti, ndërsa nga përkrahësit dhe partnerët e mëdhenj veçoi Aeroportin e Prishtinës – Limak Kosova dhe drejtorin Haldun Kokturk i cili në mënyrë të pa rezervë e ka përkrahur këëtë sport në katër vitet e fundit. Për përkrahjen tradicionale, Agoni falënderoi edhe partnerët shumëvjeçar : Korporatën Dukagjini, Grupin Mabetex dhe Suiss Diamond Hotelin, Bankën Raiffeisen dhe shumë përkrahës të tjerë. Në përmbyllje, ai theksoi dhe vlerësoi tejet lartë përkrahjen e madhe që kanë dhënë të gjitha mediumet elektronike dhe të shtypura kosovare, duke veçuar RTV 21 si sponsor medial tradicional i cili nuk ka kursyer mund dhe hapësirë për ta promovuar, tashmë këtë sport olimpik.

Artikulli paraprakRrahje masive në ndeshjen Bosnja –Greqia, edhe më e rëndë Dzeko kundër Manolas!!!
Artikulli tjetërMilan ka bërë ofertë për suedezin e jashtëzakonshëm, marrëveshja afër të realizohet!