De Biasi i vërsulet Kaçes: Me këtë sjellje do të mbetet askushi

Midis trajnerit të Kombëtares Xhani De Biazi dhe mesfushorit të përfaqësueses, Ergys Kaçe, nuk mund të ketë qetësi. Pas kryengritjeve të herëpashershme të lojtarit në pragndeshjet e kombëtares, apo kur ka munguar ftesa, këtë herë është De Biazi që ka pranuar të flasë për këtë çështje. Ai ka lënë të kuptuar direkt dhe indirekt se Kaçe është përtac, se dëgjon fjalë të kota dhe nuk dëgjon këshillat e trajnerit e për pasojë ka mbetur në vend numëro në karrierën e tij, pavarësisht se ka një talent të pazakontë.

Në intervistën e tij të gjatë për sajtin “Konica.al”, trajneri i Kombëtares u shpreh se i ka dhënë këshillat e duhura mesfushorit, por ai ende nuk ka reflektuar. Gjithsesi, De Biazi thotë se më në fund Kaçe, pas një kohe të gjatë në stol në çdo skuadër, do të ketë mundësinë të përfitojë nga kjo situatë, në mënyrë që të rrisë pjekurinë e tij.

“Mendoj se jeta i ka mësuar diçka. Është një djalë që ka talent, një djalë që nuk e ka kuptuar si funksionon futbolli, por besoj se po e kupton tani në kurriz të vet. Në jetë nuk duhet menduar asnjëherë që ke arritur synimet e tua deri në fund, sidomos për dikë të datëlindjes ’93, që sapo ka filluar rrugëtimin e tij. Shpeshherë krijohen iluzione, por unë mendoj se kjo periudhë do t’i vlejë si mësim. Nuk luan më as me një skuadër, as me një tjetër, mbeti aty ku ishte dhe do të rrijë shpesh në stol. Besoj se do t’i shndërrohet në një proces pjekurie”, theksoi De Biazi.

Më tej tekniku thotë se nuk ka ndërmend t’i japë më këshilla lojtarit, sepse diçka të tillë e ka bërë në vazhdimësi gjatë këtyre viteve.

“Jo, jo. Unë këshillat ia dhashë kur ishte momenti, më pas nuk harxhoj më energji, sepse tashmë ai duhet t’i kuptojë vetë gjërat”, shtoi trajneri italian i përfaqësueses së Shqipërisë.

Më tej de Biazi futet në karakterin e lojtarit, i cili është i vështirë në komunikim dhe që n uk e shfrytëzon si duhet talentin e tij, por që De Biazi mendon se ai është një djalë i shkëlqyer e aspak i llastuar. “Jo, jo, nuk është i llastuar. Është një djalë i jashtëzakonshëm. Shpeshherë mënyra e të shprehurit e çon të komunikojë në mënyrë të gabuar, ndoshta sepse për shkak të gjuhës ka ndonjë vështirësi. Dhe së dyti, sepse është i ri, që ende nuk ka përvojën e dinakërinë që të ruhet nga goditjet që të shmangë një mënyrë të shprehuri të veçantë gjatë intervistave. Besoj se për të kjo do të jetë një periudhë themelore. Unë qëllimisht nuk kam folur me të, nuk e kam marrë në telefon, sepse dua të shoh cili do të jetë reagimi i tij. Është një situatë nga e cila duhet të dalë me këmbët e veta. Në qoftë se vazhdon me agjentin, me shokun, me xhaxhain, me gjyshin, nuk do të mbërrijë askund. Duhet të bëjë një hap përpara dhe duhet ta bëjë me këmbët e tij. Vetëm në këtë mënyrë mund të shndërrohet në një lojtar themelor për ne”, shtoi tekniku kuqezi.

Fjalët e merkatos për Kaçen De Biazi tha se nuk i beson jo ai, por as vetë lojtari, sepse nëse do të besonte se e kërkon Reali i Madridit, kjo do të ishte fatale për një futbollist si Kaçe që bën shumë pak në stërvitje për të rritur forcën e tij. De Biazi mohon ta ketë kërkuar Interi apo ndonjë skuadër tjetër e madhe italiane.

“Se mos e ka kërkuar dhe Real Madrid apo Mançester Siti? Po, natyrisht, po të lexosh internetin… Interneti është një gjiriz budallallëqesh të vazhdueshme. Duhet të mësojmë dhe si ta lexojmë uebin, sepse nëse dikush zgjohet një ditë e shkruan që Kaçen e ka kërkuar Reali i Madridit, njerëzit e besojnë. Por e beson dhe ai vetë, kjo është dramatike! Do të duhej që të qëndronim me këmbët në tokë. Unë më parë përmenda Realin, Barcelonën e Çelsin, sepse e di që janë skuadra që nuk do të më kërkojnë kurrë, ishte për të bërë një batutë. E njëjta gjë vlen dhe për djemtë. Besoj se duhet pak inteligjencë dhe arsyetim për të thënë që këtu kemi një grup lojtarësh të mirë që mund të bëhen të shkëlqyeshëm nëse shndërrohen në një skuadër. Për të qenë një skuadër duhet që gjithkush të sakrifikojë interesat e veta personale e t’i vërë në shërbim së skuadrës. Ky është problemi kryesor”, përfundoi De Biazi.