Analizë/ Çfarë duhet të mësojë Liverpool nga “El Clasico” Barça-Real?!

“El Clasico” e së dielës, e cila përfundoi si një barazim 2-2, tregoi më të mirën dhe më të keqen e Real Madrid, duke i dhënë tifozëve të Liverpool edhe optimizëm dhe shqetësim për finalen e Ligës së Kampionëve në Kiev të shtunën, 26 maj.

Shenjat kryesore të këtij sezoni të çuditshëm për gjigandët e “Bernabeu” kanë qenë me luhatje dhe të paparashikueshme – në aspektin e përzgjedhjes së ekipit, taktikat dhe cilësinë e përgjithshme të performancës, dhe të gjithë ata përbërës u shfaqën në një natë të furishme në “Camp Nou”.

“BBC Sport” ka bërë një analizë të reparteve të Real Madrid në ndeshjen me Barcelonën ku ka treguar pikat e dobëta dhe të forta që mund të shfrytëzojë Liverpool në finale.

Mbrojtja

Hapesira ne krah te Marcelos solli golin e Suarez

Zidane humbi shërbimet e Dani Carvajal për “El Clasicon” kundër Barcelonës, për këtë në vend të tij u përshtat Nacho si mbrojtës krahu. Gjithsesi Carvajal ka probabilitet të jetë i gatshëm për finalen e Kievit, prandaj te Liverpool duhet ta llogarisin si një kartë e fortë e krahut të djathtë.

Po ashtu Sergio Ramos është një shkatërrues i padiskutueshëm, shtoi këtu aspektin mbrojtës të Casemiro që e bën mbrojtjen e Real tepër solide. Por një vend ku mund të përfitojë Liverpool është krahu i majtë, ku Marcelo luan shumë përpara duke lënë hapësira në mbrojtje, kjo u pa edhe në golin e Suarez, ku Sergi Roberto doli i lirë në krah dhe krosoi një top që u kthye në gol pasi mbrojtja ishte e paorganizuar.

Pikërisht kjo është edhe pika më e fortë e Liverpool, presingu lart, në këtë mënyrë mund të marrin topa dhe mund të gjejnë hapësira në krah për të sulmuar shpejt me lojtarë si Salah dhe Mane, madje këto të fundit mund të vënë në vështirësi edhe kapitenin Ramos që njihet për ndërhyrjet e rrezikshme, që mund t’i shkaktojnë atij edhe marrjen e kartonave.

Si përfundim Real ka mbrojtje të fortë por që të jep gjithmonë një shans për të shënuar.

Mesfusha

Casemiro nje shakterrues i mire por jo krijues dhe teknik

Pjesën më të madhe të ndeshjeve Zidane e ka luajtur me mesfushën Kroos-Casemiro-Modric, këtë e tregoi edhe në ndeshjen kundër Barcelonës, ku si zëvendësues mund të jenë kroati energjik Mateo Kovacic, apo sulmuesit Asensio dhe Vazquez.

Zidane do të jetë në dilemë nëse do të luajë me mesfushori energjik dhe teknik siç është Kovacic apo mesfushë shkatërruese me Casemiro. Braziliani është një lider dhe premton siguri në aspektin difensiv por në aspektin teknik dhe krijues është shumë larg kroatit.

Gjithsesi Zidane mund të luajë me Asensio dhe Vazquez në krah me skemën 4-4-2, e cila ka tendencë të mbrojë krahët, me Marcelo që luan shpesh në zonën e kundërshtarit.

Duke pasur parasysh alternativat që ka Zidane për të rreshtuar formacionin do të jetë një ndër vështirësitë më të mëdha të Jurgen Klopp në përgatitjen e finales, i cili do të përpiqet të parashikojë mënyrën se si do e rreshtojë ekipin Zidane.

Sulmi

Kujdes!!! Kombinimi dhe nderrimi i poizicioneve i Ronaldo dhe Benzema

Rikthimi i BBC-së në sulm ishte një nostalgji e vjetër, por që në finale është pothuajse e sigurt që Zidane nuk do preferojë Bale nga minuta e parë, prandaj Klopp duhet të bëjë llogaritë ndryshe.

Ajo çfarë u duk më shumë në ndeshjen kundër Barcelonës ishte ndërrimi i pozicioneve mes Benzema dhe Ronaldo, me francezin që luante në krah, merrte topa nga Kross dhe Modric, ndërsa Ronaldo u zhvendos si sulmues qendre, ku tregoi rrezikshmërinë e tij, si në rastin e golit edhe në disa gjuajtje që ishin mundësi të pastra shënimi.

Virgil van Dijk dhe Dejan Lovren do të kenë një natë të gjatë dhe duhet të jenë tepër vigjilent nga ndërrimi i roleve mes Benzema dhe Ronaldo pasi të dy janë vdekjeprurës në ndeshje përcaktuese. Po ashtu duhet të kenë parasysh kombinimet e tyre që kuptohen shumë mirë me njëri-tjetrin dhe gjuajtjet që ka portugezi nga jashtë zone.

Rreziku tjetër që duhet marrë parasysh është Isco, i cili është rikthyer të stërvitet në palestër dhe mund të jetë i gatshëm për finalen, prandaj mbrojtësit e Liverpool, duhet të llogarisin edhe teknikën e lartë të Isco që mund të bëjë gjithçka në një zonë të ngushtë dhe të vdekur.