ANALIZA: Montella dhe të rinjtë premtojnë, por ja pse Milani mund të ngecë

Thonë që të ëndërrosh nuk të kushton asgjë. Varet: nëse zgjohesh dhe bie nga krevati, rrezikon të vritesh dhe nëse realiteti është shumë ndryshe nga ëndrra, atëherë duhet të paguash një kosto të madhe. Në rastin e Milanit, ëndrrat mund të bëhen realitet me shumë besim dhe punë. Objektivi i madh dhe dëshira e jashtëzakonshme është rikthimi në Ligën e Kampionëve, kompeticionin ku kuqezinjtë kanë bërë histori.

“Gazzetta Dello Sport” i ka dedikuar një speciale ekipit të Milanit dhe ecurisë pozitive, duke e konsideruar një skuadër që ka bërë surpriza në këtë start të kampionatit italian. Në shkrimin e gazetës prestigjioze italiane renditen 3 arsyet pse Milani mund të shkojë në Champions dhe 3 arsyet pse kjo ëndërr mund të mbetet e tillë.

PSE PO?

1. Trajneri- Arsyeja kryesore pse Milani ka pasur ecuri pozitive është pikërisht trajneri. Lojtarët janë po ata të vitit të kaluar, por skuadra renditet më mirë dhe ka rezultate shumë të mira. Është pikërisht Montela ai që e ka bërë Milanin një skuadër, në sensin e grupit. Ai ka arritur të modifikojë skemat, të ndryshojë mënyrën e lojës dhe t’i transmetojë kësaj skuadre besimin që mund të bëjë mirë. Loja me topin dhe urdhri për të mos pasuar asnjëherë gabim, apo për ta çuar topin në drejtimin e paditur janë dy faktorë që kanë sjellë ndryshimin. Puna e tij deri tani duhet përgëzuar.

2. Bastet e fituara- Milani nuk ka një kampion të madh, por ka shumë kampionë të vegjël. Montela ka arritur të “shpikë” diçka. Niang, Suso dhe Locatelli kanë rilindur. Suso me fanellën kuqezi është një lojtar i tjetërsuar dhe me dëshirën për ta ndihmuar ekipin. Niang gjithashtu duket më i vendosur dhe më i pjekur. Fjalët për Locatellin mund të jenë të tepërta. Ai bën vepra arti gjithmonë në fushën e lojës. Paleta gjithashtu dhe Romagnoli janë baste të fituara, sepse Montela ka qenë edhe psikologu i këtyre lojtarëve.

3. Kinezët dhe merkato- Për momentin, gjithçka është në pikëpyetje, por zërat thonë se shitja e Milanit në duart e kinezëve do të bëhet shumë shpejt. Kjo gjë mund ta ndihmojë skuadrën për të bërë ndërhyrje në merkato dhe për të sjellë futbollistë me dëshirë dhe kampionë për fanellën e Milanit.

PSE JO?

1. Vazhdimësia- Milani fiket dhe ndizet. Luan mirë, por pastaj zhgënjen. Arrin rezultate pozitive dhe pastaj negative. Ekipi ka arritur vetëm 1 fitore pa vuajtje, atë kundër Lazios më të keqe të këtij sezoni. Montela ka arritur të fitojë 8 ndeshje në këtë sezon, por mund të përfundonin edhe ndryshe. Skuadra fitoi me Juventusin, pastaj bëri një figurë të keqe ndaj Xhenoas. Ky është problemi që duhet të zgjidhë kjo skuadër.

2. Vështirësia- Stoli është shumë i varfër dhe në kampin kuqezi i tremben ndonjë dëmtimi të mundshëm. Alternativat që ka Montela janë Sosa, Poli, Pasaliç, Honda, Luiz Adriano dhe disa të tjerë. Pa përmendur Juventusin, Roma dhe Napoli kanë një përbërje më të mirë në skuadër dhe rezervat garantojnë rezultate pozitive. Ose më mirë, diferenca mes lojtarëve të stolit dhe atyre titullarë nuk është e dukshme. Dhjetë futbollistë të Milanit kanë arritur 700 minuta të luajtura dhe kjo dëshmon faktin që Montela nuk u beson të gjithëve.

3. Kualiteti- Pyetja më e mirë që mund të bëhet: A është ky grup i Milanit cilësor për të arritur vendin e tretë në kampionat? Roma, Napoli dhe Interi konsideroheshin ekipe më të forta në fillimin e kampionatit. Milani nga fillimi i sezonit deri tani e ka goditur portën kundërshtare 54 herë dhe ka pësuar 55 goditje. Një shifër që nuk të lë shije të ëmbël, por të hidhur. Juve ka një bilanc +52 goditje, Napoli +39, Roma +27, Inter +11. Në fund të fundit, janë pikët ato që vlejnë dhe Milani për momentin ka aq shumë sa për të besuar tek arritja e Champions-it.