Fitorja e djeshme ndaj Napolit ka rikthyer qetësinë te Juventusi, që pas humbjes me Milanin arriti dy suksesei radhazi në kampionat, duke e çuar në 7 pikë avantazhin ndaj rivalëve. Pikërisht ky fakt bën që trajneri i bardhezinjve, Masimiliano Allegri të jetë i qetë edhe pse ka nisur që sot të mendojë për të ardhmen. “Ishte një fitore e rëndësishme, pasi Napoli është 7 pikë pas nesh në renditje. Fituam ndaj një rivali direkt për titull, duke luajtur mirë dhe dominuar në fushë. Mirë luajtën sidomos në pjesën e dytë, duke treguar se kemi një ekip të mirë dhe pretendent”, tha Allegri.
Megjithatë, trajneri nuk kënaqet me kaq, pasi mendon për sfidën e radhës, atë në Champions League. “Sezoni është i gjatë dhe pas dy ditësh do të luajmë sërish në Champions (Juventusi pret në fushën e tij francezët e Lion). E di që nuk mund të jemi përgjatë gjithë sezonit në 100%, por duhet të luajmë gjithnjë për fitore. Kjo ishte një fitore e rëndësishme jo vetëm për renditje por edhe për moral, pasi tani jemi më të karikuar për sfidën e radhës, ku besoj se do të bëjmë disa ndryshime në formacion”, deklaroi trajneri i bardhezinjve. Ndeshja e ardhshme e Juventusit është ditën e mërkurë, në Champions League ndaj Lionit.
